ភ្នំពេញ ÷ ព្រះមហាក្សត្រនៃព្រះរាជាណាចក្រកម្ពុជា ព្រះបាទ បរមនាថ នរោត្តម សីហមុនី ត្រាស់បង្គាប់ឲ្យអភិបាលខេត្តចំនួន៣ បន្តការងារបន្ថែម ១អាណត្តិទៀត។

ក្នុងព្រះរាជក្រឹត្យឡាយព្រះហស្ថលេខា ចុះថ្ងៃទី១១ ខែមេសា ឆ្នាំ២០២៣ សម្ដេចព្រះបរមនាថ នរោត្តម សីហមុនី ត្រូវបង្គាប់ឲ្យអភិបាលខេត្តបន្ទាយមានជ័យ លោក អ៊ុំ រាត្រី អភិបាលខេត្តព្រះសីហនុ លោក គួច ចំរើន នៅអភិបាលខេត្តកំពង់ចាម លោក អ៊ុន ចាន់ដា ឱ្យបន្តការងារក្នុងខេត្តរបស់ខ្លួនបានមួយអាណត្តិទៀត។

ច្បាប់​ស្តីពីការគ្រប់​គ្រងរដ្ឋបាលរាជធានី ខេត្ត ក្រុង ស្រុក ខណ្ឌ បានចែងថាអភិបាល និងអភិបាលរងរាជធានី ខេត្ត មាន​អាណត្តិ​ការងារ​មិនលើសពី ៤ឆ្នាំ។ អភិបាល និងអភិបាលរងរាជធានីខេត្ត អាច​ត្រូវបាន​តែងតាំង​ ៤ឆ្នាំទៀត សម្រាប់អាណត្តិទី២ របស់ខ្លួន​នៅក្នុងដែន​សមត្ថកិច្ច​ដដែល៕